Ispaniya Superkubogi. “Sevilya” mamlakat superkubogini eng ko‘p qo‘lga kiritgan “Barselona”ga qarshi o‘ynaydi

Bugun — 14-avgustdan 15-avgustga o‘tar kechasi Ispaniyada futbolning yangi mavsumdagi ilk uchrashuvi bo‘lib o‘tadi.

Mamlakatning amaldagi chempioni “Barselona” Ispaniya Kubogi finalida to‘p surgan “Sevilya”ga qarshi saf tortadi. Ispaniyada Superkubok o‘yini 2 tadan iborat bo‘lib, jamoalar uy-safar tizmida bellashib ko‘radi.

“Barselona” hozirga qadar 11 bor mamlakat Superkubogini qo‘lga kiritgan bo‘lib, jamoa bu borada yaqqol rekordchi hisoblanadi. Madridning “Real” klubiga esa Superkubok 9 bor nasib qilgan.

Bir yil muqaddam “Barselona” Ispaniya Superkubogini Bilbaoning “Atletik” klubiga boy berish bilan mavsumni boshlagandi. Bu safar-chi?

Toshkent vaqti bilan 14-avgustdan 15-avgustga o‘tar kechasi soat 1:00 da “Sevilya” va “Barselona” futbolchilari “Ramon Sanches Pisxuan” stadioniga chiqib keladi. “Kamp Nou”da bo‘lib o‘tadigan takroriy o‘yin 18-avgustga o‘tar kechasi soat 2:00 da start oladi.