Ulkan kitlar dengiz sutemizuvchilarini och kosatkalardan qutqaradi va olimlar hozircha buning sababi nima ekanini ishonch bilan ayta olmayapti. Ulkan kitlarning yordamga kelishining 100 dan ortiq holatlari kuzatilgan. Marine Mammal Science jurnalidagi so‘nggi tadqiqotlarga ko‘ra, kitlar dengiz mushuklarini himoya qiladi, kulrang kitlarning yo‘qolgan bolalarini onalariga yo‘naltiradi va shu bilan birga kosatkalarni haydaydi. TJournal ulkan kitlar nima sababdan okean superqahramonlariga aylanganining bir nechta misolini keltirdi.
Kitlar shunchaki kosatkalarga qarshilik qilmaydi. Katta hajmga ega bo‘lishiga qaramay, ularning o‘zi ham yirtqichlarga yegulik bo‘lishi mumkin. Balki shu sababli ham ular o‘z bolalari va urug‘larini himoya qilishga oshiqadi. Kitlar asosan Kaliforniya dengiz mushuklari, tyulen va kulrang kitlarga yordam beradi. Olimlarning fikricha, ulkan kitlar tasodifan qahramonlarga aylanadi. Ular kosatkalar hujumiga uchragan jonzotlarning ovozini eshitib, o‘z urug‘lari xavf ostida qolgan deb hisoblaydi. Kitlar yordamga boradi, kosatkalarni haydagandan so‘ng esa kulrang kit yoki dengiz mushugi qutqarilgani ayon bo‘ladi.
Olimlarning ikkinchi versiyasiga ko‘ra, ulkan kitlarda altruizm (g‘amxo‘rlik ko‘rsatish) hissi mavjud. Hayvonot olamida qush va maymunlarda ham shunday altruizm uchrab turadi. Ular ham o‘z polaponlari va bolalarini himoya qiladi. Ammo bu holat hali o‘rganilishi kerak bo‘lsa-da, olimlar ulkan kitlar orasida altruizm borligiga shubha qilmayapti.
Izoh (0)