Tailand politsiyasi mamlakatdagi portlashlarni konstitutsiya bo‘yicha o‘tkazilgan referendum bilan bog‘lamoqda

Yangi konstitutsiya loyihasi bo‘yicha o‘tkazilgan referendum yakunlaridan norozi siyosiy kuchlar Tailandda sodir etilgan portlashlar ortida turibdi. Bu haqda matbuot anjumanida mamlakat politsiyasi rahbari Chaktip Chaichinda bayonot berdi, deb ma’lum qiladi “TASS”.

“Barcha voqealar 7-avgustdan so‘ng sodir bo‘ldi. Jabrlanganlarning ko‘pchiligi konstitutsiya loyihasini qo‘llab-quvvatlaganlardir”, — dedi u.

Oxirgi sutka mobaynida Tailandning olti provinsiyasida 14 portlash ro‘y berdi (1, 2). Jumladan, Pxuket, Xuaxin singari yirik kurortlar, shuningdek, Trang, Surattxani, Pxangnga, Chumpxon provinsiyalari nishon ostiga olindi. Krabi va Nakxonsitxammarat provinsiyalarida o‘t qo‘yish bilan bog‘liq voqealar kuzatildi. To‘rt kishi halok bo‘ldi, 35 kishi jarohat oldi.

7-avgust kuni o‘tkazilgan referendumda saylovchilarning 60 foizidan ko‘prog‘i qonun loyihasini qo‘llab-quvvatlagan edi.