Avstriyalik ayol sigareta qutilaridan marhum erining rasmini olib tashlashni talab qilmoqda

Avstriyalik ayol bosh miya o‘simtasi tufayli olamdan o‘tgan erining rasmi sigareta qutilariga joylashtirilgani bois Yevrokomissiyani sudga berdi. Ayolning fikricha, Vena markaziy shifoxonasi reanimatsiya palatasida olingan surat noqonuniy ravishda, tegishli ruxsatsiz sigareta qutilariga joylashtirilgan, deb xabar bermoqda “TASS”.

Chekish bois olamdan o‘tgan kishilarning xastalik kuchayganda, qo‘rqinchli bir ahvolda tushirilgan suratlarini sigareta qutilariga joylashtirish Yevroittifoqda chekishga qarshi qo‘llanadigan choralardan biridir.

“Har safar bu suratni sigareta qutilarida ko‘rish juda og‘ir”, — dedi Yoxanna Vegerer. U qutilarda eri Fransning surati joylashtirilgani shubha qilmayapti. Avstriya sog‘liqni saqlash vaziri Sabina Oberxauzerning aytishicha esa, Yevroittifoq bu surat boshqa odamga tegishli ekanligini tasdiqlaydigan dalillarga ega.

Ayni paytda ish Vena sudida ko‘rib chiqilmoqda.