Rio—2016 Olimpiadasining futbol turnirida chorak finalga yo‘llanma olgan terma jamoalar nomi aniq bo‘ldi. Osiyo qit’asi sharafini himoya qilgan termalardan faqatgina Janubiy Koreya yarim final ostonasida to‘p surish imkoniyatini qo‘lga kiritdi.
Turnir mezboni sifatida ishtirok etayotgan Braziliya ketma-ket ikki uchrashuvda 0:0 hisobida durang o‘ynagan bo‘lsa, 3-turga kelib guruh yetakchisi Daniyani 4:0 hisobi bilan mag‘lub etdi va 5 ochko bilan guruhni 1-o‘rinda yakunladi.
O‘zbekiston olimpiya terma jamoasini Rio chiptasidan mosuvo qilgan Iroq Olimpiadani mag‘lubiyatsiz yakunlab, 3-turda ham durang o‘ynadi — Iroq — JAR 1:1. Bu esa Daniyani 4 ochko bilan guruhdan chiqib olishiga yordam berdi.
“B” guruhini Nigeriya terma jamoasi muddatidan avval 6 ochko bilan peshqadam sifatida yakunlagandi. 3-turda afrikaliklar Kolumbiyadan 0:2 hisobida yengildi. Yaponiya terma jamoasi Shvetsiya ustidan 1:0 hisobida zafar quchgan bo‘lsada, guruhda 4 ochko bilan qolib ketdi. 2-o‘rin 5 ochko to‘plagan Kolumbiyaga nasib qildi.
Musobaqaning “C” guruhida Janubiy Koreya termasi 7 ochko bilan peshqadam bo‘ldi. “Osiyo yo‘lbarslari” so‘nggi turda Meksikani 1:0 hisobida mag‘lub etdi. Fiji davrozasiga javobsiz 10 ta gol urgan Germaniya 5 ochko bilan guruhni 2-o‘rin bilan yakunladi.
Va nihoyat “D” guruhida Portugaliya terma jamoasi 7 ochko bilan yetakchi bo‘ldi. Argentina terma jamoasi so‘nggi turda Gonduras bilan 1:1 hisobida durang o‘ynab, Rio—2016 dagi ishtirokiga yakun yasadi. Gondurasning o‘zi yarim final yo‘lida kurashni davom ettiradi.
Rio—2016. Futbol Chorak final juftliklari
13-avgust, shanbaPortugaliya — GermaniyaNigeriya — Daniya
14-avgust, yakshanbaJanubiy Koreya — GondurasBraziliya — Kolumbiya
Izoh (0)