Rio-de-Janeyro Olimpiadasining 91 kilogrammgacha bo‘lgan bokschilar o‘rtasidagi musobaqasida O‘zbekiston sharafini himoya qilayotgan Rustam To‘laganov yarim final yo‘llanmasi uchun ozarbayjonlik Abduqodir Abdullayevga qarshi ringga ko‘tarildi.
Jangning birinchi raundi ozarbayjonlik sportchi foydasiga hal bo‘ldi. Ikkinchi raundda o‘ziga kelib olgan Rustam To‘laganov, uni muvaffaqiyatli yakunladi. Hal qiluvchi raundda esa To‘laganov raqibidan yana bir bor ustunlik qilib, yarim finalga yo‘llanma oldi.
Bu O‘zbekiston delegatsiyasi yana bitta medal bilan boyiganini bildiradi. Rustam eng kamida bronza medalini qo‘lga kiritadi. Unda oltin medal uchun kurash olib borish imkoniyati saqlanib turibdi.
Rustam To‘laganov 1/8 finalda ekvadorlik Julio Sezar Kastilyoga qarshi jang qilib, uchala raundni ham o‘z foydasiga hal qilgandi.
Yarim finalda Rustam To‘laganov rossiyalik Yevgeniy Tishenko bilan jang qiladi. Tishenko bunga qadar braziliyalik Juan Nogeyra va italiyalik Klemente Russoni turnirdan chiqarib yuborgandi. Uning o‘zbekistonlik bokschiga qarshi jangi 13-avgust kuni bo‘lib o‘tadi.
Izoh (0)