Argentinada uysiz it unga mehmonxona kirishida yemak bergan styuardessani olti oy mobaynida kutdi. Bu haqda, Daily Mail’ga asoslanib, TJournal xabar bermoqda.
Germaniyalik styuardessa Oliviya Zivers Buenos-Ayresga komandirovkalari chog‘ida mehmonxona oldida uni har doim o‘sha it kutib turgani haqida hikoya qilib berdi.
Zivers itga mehribonlik ko‘rsatgani bois jonivor hamma yerda uning ortidan yuradigan bo‘ldi; styuardessa uchib ketganida esa it uni mehmonxona oldida kutardi.
Ayol itni Buenos-Ayresdagi tanishlaridan birining uyiga joylashtirmoqchi bo‘ldi, ammo it qochib ketib, yana eski joyiga qaytib kelaverdi.
Yarim yildan so‘ng Zivers xonim axiyri itni asrab olishga qaror qildi va jonivorni Argentinadan Germaniyaga olib ketish uchun ariza kiritdi. U itga Rubio laqabini berdi. Ayni paytda ayol itining fotosuratlarini Facebook’da joylashtirib bormoqda.
Izoh (0)