Amaldagi tartiblarga muvofiq, O‘zbekistonda rezidentlarga 2000 AQSh dollari ekvivalentidagi naqd xorijiy valyutalarni yo‘lovchi bojxona deklaratsiyasida yozma qayd etish sharti bilan erkin olib chiqib ketishiga ruxsat etiladi. Shunga qaramasdan, amaldagi tartiblarni qo‘pol ravishda buzib, naqd xorijiy valyutalarni noqonuniy ravishda olib chiqishga urinish holatlari ham uchrab turibdi, deya xabar bermoqda Toshkent shahar Bojxona boshqarmasi axborot xizmati.
Yaqinda Toshkent shahar bojxona boshqarmasining “Keles” temir yo‘l chegara bojxona posti xodimlari tomonidan shu turdagi bir nechta qonunbuzarlik holatlarining oldi olindi.
Jumladan, Toshkent—Moskva yo‘nalishidagi yo‘lovchi poyezdini bojxona nazoratidan o‘tkazish davomida bojxonachilar tomonidan bir nechta qonunbuzar yo‘lovchilarning qing‘ir qilmishlariga nuqta qo‘yildi.
Masalan, yo‘lovchilardan biri yashnobodlik A.Yo‘lchiyeva (barcha ism-shariflar o‘zgartirilgan) shaxsiy ko‘rikdan o‘tkazilganda yo‘lovchi bojxona deklaratsiyasida ko‘rsatilmagan va og‘zaki so‘rovlar vaqtida ma’lum qilinmagan 350 AQSh dollari va 350 yevroni ichki kiyimlari orasiga bekitgancha olib o‘tishga uringani aniqlandi.
Ayni shu usuldan foydalanib K.Mixaylova ham 748 AQSh dollari, 100 yevro va 1500 Rossiya rublini olib o‘tishga uringan.
Toshkent—Novosibirsk yo‘nalishidagi poyezd yo‘lovchisi A.Yo‘ldasheva ham bojxonachilarning ko‘zini shamg‘alat qilishga urinib, 1500 AQSh dollari va 3000 Rossiya rublini ichki kiyimlariga yashirgancha olib chiqishga uringan paytda to‘xtatib qolindi.
Shu reys bo‘yicha harakatlanayotgan yana bir fuqaro O.Kuznetsovaning esa 6700 AQSh dollarini yo‘lovchi bojxona deklaratsiyasida ko‘rsatmasdan turib, qo‘l yuklari orasiga yashirgancha olib chiqmoqchi bo‘lganligi fosh qilindi.
Hozirda yuqoridagi holatlar yuzasidan bojxona tekshiruvlari va surishtiruv harakatlari davom ettirilmoqda.