Rossiyaning Kobuldagi elchixonasi “Tolibon” jangarilari Afg‘oniston hududida Rossiya fuqarosini garovga olganini tasdiqladi. Bu haqda, diplomatik missiya press-attashesi Aleksey Kosarevning bayonotiga tayanib, “Interfaks” xabar bermoqda.

“O‘z kanallarimiz orqali Rossiya fuqarosi garovga olinganining tasdig‘iga ega bo‘ldik”, — dedi u agentlik bilan suhbatda.

Shu bilan birga, Afg‘oniston hukumati bu borada biror rasmiy axborot taqdim etmadi.

Eslatib o‘tamiz, 4-avgust kuni Afg‘onistonning Log‘ar viloyatida Pokistonning Mi-17 vertolyoti “Tolibon” jangarilariga tegishli hududga majburiy qo‘nishni amalga oshirdi. Ekipajning yetti a’zosi orasida rossiyalik muhandis ham bor edi. Toliblar ularning barini garovga oldi.