Suriya O‘zbekistonga qarshi bellashuv uchun Rossiyada tayyorgarlik ko‘rishga qaror qildi

O‘zbekiston milliy terma jamoasining JCh—2018 yo‘lidagi raqibi Suriya 15-avgustdan e’tiboran Rossiyaga tashrif buyuradi. Bu haqda “Championat.asia” Eronning Isna nashriga asoslanib ma’lumot berdi.

1-sentabr kuni suriyaliklar Toshkentda O‘zbekiston milliy terma jamoasiga qarshi maydonga tushadi. Rasmiy o‘yinga tayyorgarlik ko‘rish uchun Suriya ikkita o‘rtoqlik o‘yinida ishtirok etadi. Raqiblar Tojikiston va Livan.

Notinchlik hukmron bo‘lib turgan Suriyada uy uchrashuvlarini o‘tkaza olmaydigan mamlakat bosh jamoasi Livan bilan kelishuv amalga oshmagach, Eron variantida to‘xtalgani aytilgan. Eron va Suriya Rossiya mundiali uchun bitta guruhda kurash olib borishiga qaramay, Suriya uch uchrashuvlarini fors diyorida o‘tkazishga yaqin.

O‘zbekiston va Suriya joy olgan guruhda Eron, Janubiy Koreya, Qatar hamda Xitoy termalari ham ishtirok etadi.