2016-yil 5-avgust kuni O‘zbekiston Respublikasi Oliy Majlisi Senati Kengashining majlisi bo‘lib o‘tdi. Kengash Senatning oltinchi yalpi majlisini joriy yilning 24–25-avgust kunlari Toshkent shahrida chaqirish to‘g‘risida qaror qabul qildi, deb xabar beradi O‘zA.

Senatorlar O‘zbekiston davlat mustaqilligining 25 yilligi arafasida o‘tkazilayotgan yalpi majlisning kun tartibiga Senatning o‘tgan davrdagi faoliyati yakunlariga va kelgusi yildagi ustuvor vazifalarga bag‘ishlangan ma’ruzaning kiritilishi muhim ekanligini alohida qayd etdi.

Senatning yalpi majlisida mamlakatning ijtimoiy-siyosiy va sotsial-iqtisodiy hayotining barcha sohalarini izchil isloh qilish hamda erkinlashtirishga, O‘zbekiston Prezidentining Konstitutsiya 23-yilligiga bag‘ishlangan tantanali yig‘ilishdagi ma’ruzasida bayon etilgan vazifalarni bajarishga qaratilgan bir qator qonunlar ko‘rib chiqiladi. “Yoshlarga oid davlat siyosati to‘g‘risida”gi, “Ichki ishlar organlari to‘g‘risida”gi, “Mehnatni muhofaza qilish to‘g‘risida”gi (yangi tahriri), “Hayvonot dunyosini muhofaza qilish va undan foydalanish to‘g‘risida”gi (yangi tahriri) va boshqa qonunlar shular jumlasidandir.

Majlisda Kengash vakolatiga kiradigan boshqa masalalar ham ko‘rib chiqildi. Barcha muhokama etilgan masalalar yuzasidan tegishli qarorlar qabul qilindi.