2016-yilning 5-avgust kuni O‘zbekiston Respublikasi Oliy Majlisi Qonunchilik palatasining navbatdagi majlisi bo‘lib o‘tdi. Bu haqda O‘zA xabar bermoqda.
Deputatlar jamiyat hayotining turli sohalarida amalga oshirilayotgan islohotlarni yanada chuqurlashtirishga, fuqarolarning huquqlari, erkinliklari va qonuniy manfaatlarini himoya qilishga qaratilgan bir qator qonun loyihalarini ko‘rib chiqdi.
Majlis “Yoshlarga oid davlat siyosati to‘g‘risida”gi qonun loyihasining muhokamasi bilan boshlandi. Deputatlar qonun loyihasining qabul qilinishi yoshlarning huquq va qonuniy manfaatlarini mustahkamlash, yoshlarga oid davlat siyosatini amalga oshirishda davlat organlari va boshqa tashkilotlarning mas’uliyatini kuchaytirish, ushbu sohada qabul qilinayotgan chora-tadbirlar samaradorligini oshirish imkonini berishini ta’kidladi.
Shundan keyin deputatlar e’tiboriga “Ichki ishlar organlari to‘g‘risida”gi qonun loyihasi taqdim etildi. Qonun loyihasida ichki ishlar organlarining asosiy vazifa, faoliyati yo‘nalishlari va prinsiplari hamda ularning vakolat va majburiyatlari, shuningdek, ushbu idoralarda xizmat o‘tash tartibi va shartlari, xodimlarning xuquqiy va ijtimoiy himoyasi yaxlit hujjatda mujassam etilayotganligi bilan muhim ahamiyat kasb etadi. “Ichki ishlar organlari to‘g‘risida”gi qonun loyihasidagi taklif etilayotgan normalar erkinlik, adolat, qonun ustuvorligi kabi ijtimoiy qadriyatlarni demokratik huquqiy davlat qurish jarayoniga singdirishda muhim ahamiyat kasb etadi. Qonun loyihasida aynan huquqiy tartibga solishning xorijiy va milliy tajribasi inobatga olinganligi alohida e’tirof etildi.
Deputatlar yangi tahrirdagi “O‘simlik dunyosini muhofaza qilish va undan foydalanish to‘g‘risida”gi qonun loyihasini ham muhokama qildi. Muhokama jarayonida deputatlar mazkur qonun loyihasi huquqni qo‘llash amaliyotining ta’sirchanligini oshirish va qonun hujjatlaridagi ayrim kamchiliklarni bartaraf etish nuqtai nazaridan yangi tahrirda ishlab chiqilganligini alohida qayd etdi. Qonun loyihasi biologik xilma-xillikning ajralmas qismi sifatida yovvoyi holda o‘suvchi o‘simliklar genofondi kompleks ravishda muhofaza qilinishini ta’minlashni nazarda tutadi. Qonun loyihasida davlat organlarining vakolatlari aniq ko‘rsatilgan va ushbu sohadagi munosabatlarni tartibga solish yuzasidan ularning vazifalari belgilab berilmoqda. O‘simlik dunyosini muhofaza qilish va undan oqilona foydalanishga qaratilgan ta’sirchan chora-tadbirlarni amalga oshirishda fuqarolarning o‘zini o‘zi boshqarish organlari, nodavlat notijorat tashkilotlari va fuqarolarning ishtirok etishiga oid normalarni mustahkamlab qo‘yish lozimligiga e’tibor qaratilgan.
Mazkur huquqiy hujjatlar loyihasini muhokama qilishda barcha siyosiy partiyalar fraksiyalari va O‘zbekiston Ekologik harakati deputatlar guruhi vakillari ishtirok etdi va o‘z munosabatlarini bildirdi.
Muhokamalar yakunlariga ko‘ra tegishli qarorlar qabul qilindi. Deputatlar majlis kun tartibidagi boshqa masalalarni ham ko‘rib chiqdi.
Izoh (0)