AQSh politsiyasi Nyu-York va Filadelfiya shaharlarining kriminal oilalariga mansub bir qancha mafiya yetakchilari va ularning yordamchilarini qo‘lga oldi. Bu haqda “TASS” xabar bermoqda.

Jami 39 kishi hibsga olindi. Ular AQSh Sharqiy sohilbo‘yidagi Nyu-York, Pensilvaniya, Massachusets va Florida shtatlarida taqiqlangan faoliyat turlari bilan shug‘ullanishda ayblanmoqda, deb ma’lum qildi Federal qidiruv byurosining Nyu-York shtati Janubiy okrug bo‘linmasi.

“Ayblov xulosasi pul undirish, g‘ayriqonuniy o‘yinlar, o‘t qo‘yish va qo‘rqitish bilan shug‘ullangan eski maktab mafiozilari haqidagi romanni eslatadi. Hozir ular bu jinoyatlarni kredit kartalarni o‘g‘irlash hamda kriminalning boshqa zamonaviy turlari bilan uyg‘unlikda olib bormoqda”, — dedi filial rahbari Diyego Rodriges.

Qamoqqa olingan mafiya a’zolari orasida Nyu-York shtatida ishlovchi Jenoveze, Gambino, Lucheze, Bannano oilalari, shuningdek, Italiya “koza nostra”sining Filadelfiyadagi oilalari vakillari bor. Jumladan, “koza nostra” yetakchilaridan Jezef Merlino va Nyu-Yorkdagi jinoiy guruh rahbari Paskuale Parello hibsga olinganlar orasidadir.

39 kishi qo‘lga olinganiga qaramay, ayblov xulosasida 46 ism tilga olingan. Ish bo‘yicha nmoi kechgan yetti jinoyatchi ilgariroq qo‘lga olingan edi. Reydlar davomida mafiyachilar yonidan o‘qotar qurol va 30 ming dollardan ortiq naqd pul topildi.