Toshkent viloyatidagi Chorvoq suv ombori plyajlari bir muddat yopiq turganidan so‘ng yana ishga tushdi. Bu haqda “Gazeta.uz” xabar bermoqda.
Ko‘p yillar davomida bunday zonalarga qo‘yiladigan elementar talablarga nomuvofiqligi bois tanqid ostiga olingan plyajlar nihoyat dam olish va cho‘milish uchun xavfsiz joyga aylandi.
Eng ko‘p aholi tashrif buyuradigan plyajlardan biri — “Yusufxona”da sohilbo‘yi hududi chiqindilardan tozalandi, suvda to‘siqlar paydo bo‘ldi, katamaranlar va katerlar turargohi alohida joylashtirildi.
Avtomobillarga plyaj hududiga kirish taqiqlandi — avtoturargohdan plyajgacha piyoda borish lozim bo‘ladi.
Qirg‘oq bo‘ylab soyabonlar o‘rnatildi, ularni shezlonglar bilan birga ijaraga olish mumkin. Yopiq topchanlar o‘rniga ko‘rpacha va kursilarga ega chodirlar o‘rnatildi.
“Chorvoq oromgohi” dam olish hududi plyajida ham cho‘miluvchilar hamda qayiq-katamaranlar hududlari ajratib qo‘yildi.
Shuni ham aytib o‘tish joizki, barcha talablarga javob beradigan plyajlar Chorvoqda ilgari ham bor edi (masalan, “Sharshara”), lekin aksariyati bunday emas edi.
May oyining oxirida Vazirlar Mahkamasi plyajlarni jihozlash va ulardan foydalanish talablarini tasdiqlagan edi.
Izoh (0)