Faoliyati davomida 18 ming marta samolyotdan parashyutda sakragan amerikalik professional skaydayver Lyuk Eykins yana bir sakrashni amalga oshirmoqchi. Bu safargi sakrashning avvalgilaridan farqi – Lyuk Eykinsda na parashyut va na boshqa moslamalar bo‘ladi. Tafsilotlar haqida Associated Press ma’lum qildi, deb xabar bermoqda “TASS”.
Eykins 12 yoshida ilk sakrashini amalga oshirgandi. Hozir u 42 yoshda va shu vaqtgacha bir qancha shogirdlarni yetishtirdi. Ekstremal “Temir odam 3” (Iron Man 3) filmining syomkalarida ham ishtirok etgan. Bir necha yil avval esa Gollivuddagi ikki yigit unga parashyutsiz sakrash haqida g‘oya berdi.
Avvaliga Lyuk va uning turmush o‘rtog‘i bu taklifni rad etdi. “‘Yo‘q, ular meni hech narsasiz sakrashga ko‘ndira olmaydi’ dedim men. Biz ikkimiz bu g‘oyaning ustidan kuldik”, – dedi Eykins. Ammo bu g‘oya parashyutchini tark etmadi. U o‘zining uzoq yillik karyerasi davomida bir qancha ko‘ngilsizliklarga duch kelgan: uning asosiy parashyuti boshqalari bilan o‘ralib qolgan paytlari bo‘lgan. Zaxira parashyutini u qariyb 30 marta ishlatgan. Bu esa yiliga 800 marta sakrashni amalga oshiradigan kishi uchun yaxshi ko‘rsatkich.
Eykins parashyutsiz saklash uchun yechim topdi. Samolyotdan sakragandan so‘ng yerga qulamaslik uchun ikkita qurilish kraniga futbol maydonining uchdan bir qismiga teng to‘r bog‘lanadi. Lyuk 7,6 kilometr balandlikdan sakrab, muvaffaqiyatli qo‘nishi uchun to‘r 20 qavatli bino balandligida osilib turadi. Bu yerda texnik murakkablik shundaki, to‘r tarang tortilmasligi va parashyutchining qo‘nishi uchun qulay bo‘lishi kerak. Umuman olganda tajribalar muvaffaqiyatli o‘tdi, faqatgina 91 kilogrammlik maneken yerga quladi.
“Amalga oshirmay turib bizga imkonsiz deb tuyulgan narsalarni bajarishga qodir ekanimizni isbotlash uchun yaxshi imkoniyat”, – dedi ekstremal. Yerda Lyuk Eykinsni 2 ming marta sakrashni amalga oshirgan turmush o‘rtog‘i va to‘rt yashar o‘g‘li kutib turadi. Parashyutchining sakrashini Fox telekanali to‘g‘ridan-to‘g‘ri namoyish qiladi. Lyuk Eykinsning sakrashi AQSh Sharqiy vaqti bilan 30-iyul, soat 20:00 (Toshkent vaqti bilan 31-iyul, soat 05:00)da amalga oshiriladi.
Izoh (0)