Aktrisa Shahzoda Muhamedova aktyor va rejissor Azamat Ahrorovga turmushga chiqishi haqida turli xabarlar paydo bo‘ldi. Mazkur gap-so‘zlarga aniqlik kiritish maqsadida jurnalist Feruz Muhammad Azamat Ahrorov bilan bog‘landi.

Foto: “Daryo”

Foto: “Daryo”

— Siz va aktrisa Shahzoda Muhamedova o‘rtasida ijodiy hamkorlik qachondan boshlangan?

— Bundan ikki yil avval, 2014-yili “Yuragim seniki” nomli film suratga olganman. O‘sha filmdan ijodiy hamkorligimiz boshlangan edi. Shundan so‘ng “Notanish qotil” nomli rejissorlik ishimda ham u bilan birgalikda bosh rollarni ijro qilganmiz.

— Demak, muhabbatingiz tarixi 2014-yilda boshlangan ekanda?

— Yo‘q, biz unda faqat ijodiy hamkor va do‘st edik. “Notanish qotil” filmining tasvirga olish ishlari vaqtida unga muhabbatimni aytib, qo‘lini so‘raganman.

— To‘y kuni aniq bo‘ldimi?

— To‘y kuni aniq emas. To‘y, menimcha, 2016-yil oxiri yoki 2017-yil boshlarida bo‘lsa kerak.

— Aktrisa Shahzoda Muhamedova sizga turmushga chiqqanidan so‘ng ham aktrisalik faoliyatini davom ettiradimi?

— Ha, faqat mening filmlarimda rol o‘ynaydi.

— Boshqa filmlarda-chi?

— Ko‘ramiz. Asosan o‘zimning filmlarimda rol o‘ynashini xohlayman. Boshqa filmlarga kelsak, ularning ssenariysiga qarab, maslahatlashib, biror fikr bildiramiz.

— Ayni kunlarda Muhamedova bilan birgalikda suratga tushishni rejalashtirgan loyihalaringiz bormi?

— Yaqinda xuddi shunday lohiha sabab ishchi nomi “Sen uchun” deb nomlangan filmning syomkasi uchun Shahzoda va ijodiy jamoamiz bilan birga Xitoyga ketyapmiz. Xitoyga sayohatimiz 19-avgust kuni boshlanadi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.