Maxsus tribunal “Afrika Pinocheti” qurbonlariga to‘laydigan tovon miqdorini belgiladi
Dakardagi maxsus tribunal Chadning sobiq prezidenti Xissen Xabre uning xatti-harakatlari tufayli jabrlanganlarga tovon puli to‘lashi lozimligini belgiladi. Bu haqda, AFP’ga asoslanib, “TASS” xabar bermoqda.
Har bir kishiga 15–30 ming yevro miqdorida tovon puli to‘lanishi aytilmoqda.
Afrika ittifoqi tomonidan Senegal hukumati bilan kelishilgan holda yaratilgan maxsus tribunal vakilining so‘zlariga qaraganda, tovon pullari jinsiy zo‘ravonlik qurbonlari, noqonuniy hibsda saqlanganlar, shuningdek, prezidentning xatti-harakatlari tufayli jabrlanganlarga to‘lanadi. Jabrlanuvchilarning aniq soni aytilmadi.
May oyining oxirida maxsus tribunal Chadning sobiq prezidentini insoniyatga qarshi jinoyatlarni sodir etishda aybdor deb topib, bir umrlik qamoq jazosiga hukm etgan edi.
73 yoshli Xabre 1982–1990-yillar mobaynida hokimiyat tepasida bo‘lib, shu davr ichida sodir etgan jinoyatlari tufayli “Afrika Pinocheti” nomini olgan edi. Huquq himoyachilarining uqtirishicha, u 40 mingdan ortiq odamning o‘limida aybdor.
