250 nafar rossiyalik sportchiga Olimpiadada qatnashish uchun ruxsat berildi

Xalqaro sport federatsiyalari 250 nafar rossiyalik sportchiga Rio-de-Janeyrodagi yozgi Olimpiada o‘yinlarida qatnashishga ruxsat berdi. Bu haqda Rossiya olimpiya qo‘mitasi raisi Aleksandr Jukov ma’lum qildi, deb yozadi “Vedomosti”.

Uning so‘zlariga ko‘ra, qayerdadir talabnoma to‘liq ma’qullangan bo‘lsa, qayerdadir esa Olimpiadaga hozircha sportchilarning faqat bir qismi qo‘yilgan. “Masalan, suv polosi bo‘yicha jamoaning barcha 12 a’zosi ma’qullangan, voleybol jamoasidan 24 kishidan 24 kishiga ruxsat berilgan”, — dedi Jukov. Shuningdek, u kurash bo‘yicha berilgan talabnomalar ham tasdiqlanganini aytib o‘tdi.

24-iyul kuni Xalqaro olimpiya qo‘mitasi Olimpiada o‘yinlaridan butun Rossiya termasini chetlatish o‘rniga, nomzodi tegishli sport turlarini nazorat qiladigan xalqaro federatsiyalar tomonidan ma’qullangan sportchilargagina ruxsat berish haqida qaror qabul qildi.