Rossiya federal bojxona xizmati boshlig‘i Andrey Belyaninovning uyini taftish qilish vaqtida nafaqat rubl, dollar va yevro shaklidagi pullar, balki zargarlik buyumlari ham musodara qilindi, deb yozadi “Gazeta.ru”. Bu haqda “Interfaks” huquq-tartibot organlaridagi manbasiga tayanib xabar berdi.
“Belyaninovning uyidagi tintuvlar chog‘ida 9,5 million rubl, 390 ming dollar va 350 ming yevro musodara qilindi. Bundan tashqari, zargarlik buyumlari olib qo‘yildi”, — dedi manba.
Uning so‘zlariga ko‘ra, tekshiruvlar davomida ushbu mablag‘lar qayerdan kelgani aniqlanadi. Belyaninovning o‘zi esa yirik summadagi mablag‘ shaxsiy jamg‘armasi ekanligini aytdi.
Manba ta’kidlashicha, ushbu da’vo tasdiqlansa, musodara qilingan mablag‘ qaytarib beriladi.
Avvalroq Rossiya Federal xavfsizlik xizmati xodimlari Federal bojxona xizmati boshlig‘i Andrey Belyaninovning hamda “Arsenal” kompaniyalar guruhi rahbari, ilgari Belyaninovning maslahatchisi bo‘lgan Sergey Lobanovning uylarida tintuv o‘tkazgan edi. Tintuv chog‘ida uylardan pulga to‘ldirilgan poyabzal qutilari va qadimiy rasmlar topildi.
Izoh (0)