2016-moliya yilining uchinchi choragida Apple kompaniyasining sof foydasi 27 foizga kamaydi, deya xabar bermoqda “Interfaks”.
Kompaniya press-relizida aytilishicha, 25-iyun kuni tugagan chorak yakunlariga ko‘ra, sof foyda 7,8 milliard dollarga teng bo‘ldi. O‘tgan moliya yilining xuddi shu davrida esa ushbu ko‘rsatkich 10,68 milliard dollarni tashkil qilgan. Apple foydasi bitta aksiya hisobida 1,85 dollardan 1,42 dollargacha kamaydi.
Shu tariqa, joriy hisobot davrida kompaniya o‘tgan yilning shu davriga nisbatan 7 milliard dollarga kam pul ishlab topdi. Ushbu chorakdagi Apple daromadi esa 14,6 foizga qisqarib, 42,36 milliard dollarni tashkil etdi.
Foyda iPhone savdosi ketma-ket ikki chorakdan buyon qisqarib ketayotgani fonida pasaydi. O‘tgan chorakda 40,4 million dona iPhone sotildi, o‘tgan moliya yilining uchinchi choragida esa 47,5 millionta smartfon sotilgan edi.
Izoh (0)