Toshkentdagi Parkent bozoriga yaqin chorrahada haydovchilardan biri qari onaxonni yo‘ldan o‘tkazib qo‘yish uchun avtomobillar harakatini to‘xtatib turdi. Bu haqda Facebook’dagi “Voditeli Tashkenta” guruhida xabar qoldirilgan.

Xabar muallifi avtomobillar harakatini ma’lum vaqt to‘xtatib qo‘ygan bo‘lsa-da, oq rangli Lacetti haydovchisiga minnatdorchilik bildirgan.

“Mashinalarning katta oqimi sabab, qari onaxon chorrahadan o‘ta olmayotgan edi. Shu vaqt, svetoforning yashil chirog‘ini kutib turgan mashinalarning biridan haydovchi tushib, yo‘lni to‘sib qo‘yayotgan uchun uzr so‘ragan holda, onaxonni yo‘ldan o‘tkazib qo‘ydi”, — deb yozadi xabar muallifi.

“Uning bu harakatidan shaxsan mening ko‘nglim juda ko‘tarildi. Barakalla! Keksalar har vaqt izzat-hurmatda bo‘lishi kerak”, — deb qo‘shimcha qilgan “Voditeli Tashkenta”da xabar qoldirgan foydalanuvchi.

“Voditeli Tashkenta”ning mazkur xabarga munosabat bildirgan foydalanuvchilari aksariyati Lacetti haydovchisining mazkur harakatini olqishlagan. “Mana shunday yaxshi odamlar ko‘payaversin!”, — deydi foydalanuvchilardan biri.

Ayni vaqtda, bir guruh foydalanuvchilar bunday holatlar aslida odatiy bo‘lishi kerakligi, bunday harakatlar uchun kishilarni qahramonga chiqarib qo‘yish maqsadga muvofiq emasligini qayd etib o‘tgan.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.