Toshkentda Braziliyaning Rio-de-Janeyro shahrida joriy yilning avgust-sentabr oylarida bo‘ladigan XXXI yozgi Olimpiya va XV Paralimpiya o‘yinlarida ishtirok etadigan O‘zbekiston sport delegatsiyasini kuzatish marosimi bo‘lib o‘tdi. Bu haqda O‘zbekiston Milliy olimpiya qo‘mitasining axborot xizmati ma’lum qildi.
To‘rt yillikning eng yirik sport o‘yinlariga yo‘l oladigan O‘zbekiston sport delegatsiyasi a’zolari an’anaga muvofiq Mustaqillik va ezgulik monumenti, Amir Temur hamda Alisher Navoiy haykallari poyiga gul qo‘ydi.
Tadbirda O‘zbekiston Respublikasi Bosh vaziri Shavkat Mirziyoyev ishtirok etdi. U XXXI yozgi Olimpiya va XV Paralimpiya o‘yinlarida sportchilarga muvaffaqiyat tiladi.
Tadbirda, shuningdek, O‘zbekiston Milliy olimpiya qo‘mitasi raisi, senator M. Usmanov chiqish qildi. So‘zga chiqqan sportchilar Olimpiya o‘yinlarida o‘zlarining mahoratini namoyish etib, yuksak g‘alabalar bilan qaytishga va’da berdi. Bu g‘alabalar mustaqillikning 25 yillik bayramiga tuhfa bo‘lajagi ta’kidlandi.
Olimpiya o‘yinlarida o‘zbekistonlik sportchilar akademik eshkak eshish, badiiy gimnastika, baydarka va kanoeda eshkak eshish, boks, dzyudo, yengil atletika, og‘ir atletika, sport gimnastikasi, stol tennisi, suzish, taekvondo (WTF), tennis, tramplin, o‘q otish, erkin va yunon-rum kurashi kabi sport turlari bo‘yicha bahslashadi. Ular orasida Olimpiya o‘yinlari va jahon chempionatlari g‘olib va sovrindorlari bo‘lgan tajribali sportchilar bilan bir qatorda ushbu musobaqada ilk marotaba ishtirok etadigan yosh sportchilar ham ko‘p.
Shuningdek, Rio–2016 Paralimpiya o‘yinlarida O‘zbekiston 2012-yili Londonda bo‘lib o‘tgan Paralimpiya o‘yinlariga nisbatan uch barobar ko‘p ishtirokchilar bilan qatnashadi.
O‘zbekiston sport delegatsiyasini kuzatish marosimida, shuningdek, O‘zbekiston Respublikasi Oliy Majlisi Senatining Raisi N. Yo‘ldoshev va Qonunchilik palatasi Spikeri N. Ismoilov ishtirok etdi.
Izoh (0)