Myunxenda otishma uyushtirgan shaxs yil davomida hujumni rejalashtirgan. Bu haqda Bavariya jinoiy politsiyasi rahbari Robert Xaymberger ma’lum qildi, deya xabar beradi “TASS”.

“Hujum bir yil davomida rejalashtirib kelingan. Qurbonlar maxsus tanlanmagan. Qurol internetning anonim segmentlaridan biri — darknet orqali xarid qilingan. To‘pponcha qayerda saqlangani noma’lum, yigitning xonasidan boshqa qurol topilmadi”, — deya ta’kidladi Xaymberger.

Shuningdek, myunxenlik mergan ommaviy qotilliklar bilan qiziqqani haqidagi taxminni tasdiqlovchi yana bir dalil topildi. U 2009-yili 15 nafar maktab o‘quvchisi o‘ldirilgan Germaniyaning Vinnenden shahriga borgani va jinoyat joyini suratga tushirgani ma’lum bo‘ldi. Suratlar uning fotoapparati xotirasidan topildi.

Eslatib o‘tamiz, kelib chiqishi eronlik bo‘lgan 18 yoshli Germaniya fuqarosi Myunxendagi savdo markazida 9 kishini otib tashladi, keyin esa o‘z joniga qasd qildi.