Armaniston prezidenti Serj Sargsyan Yerevanda politsiya binosini egallab olgan tarafdorlari ozod etilishini talab qilayotgan “Ta’sischi parlament” koordinatori Jirayr Sefilyan bilan uchrashishga tayyor. Bu haqda “Interfaks” xabar bermoqda.

“Mening vositachiligimda qamoqxonada Sefilyanning rasmiylarning yuqori martabali vakili va ‘Ta’sischi parlament’ a’zosi Alek Yenigomshyan bilan uchrashuvi bo‘lib o‘tdi. Sefilyan uni bezovta qilayotgan milliy ahamiyatga ega masalalarni ko‘tardi, biz ularni Armaniston prezidentiga yetkazishga va’da berdik. Biz va’damizni bajardik: prezident yigitlar qurolni topshirib, taslim bo‘lgach, Sefilyanni taklif etish va u bilan mavjud vaziyat hamda istiqbolni muhokama etishga tayyorligini ma’lum qildi”, — deyiladi rasmiylar va qurolli guruh o‘rtasidagi asosiy vositachi, tan olinmagan Tog‘li Qorabog‘ respublikasi parlamenti deputati Vitaliy Balasanyanning 24-iyul, yakshanba kuni tarqatilgan bayonotida.

Deputatga ko‘ra, Sefilyan “hozirgi bosqichda prezident iste’foga chiqishi talabidan voz kechishi”ni bildirgan.