Kuvayt amirligi hududida Yer sayyorasida kuzatishlar tarixi davomidagi eng yuqori havo harorati qayd etildi. Bu haqda, Al Arabiya telekanaliga asoslanib, “TASS” xabar bermoqda.
Selsiy shkalasi bo‘yicha 54 (Farengeyt bo‘yicha 129) daraja issiq 20-iyul, chorshanba kuni Kuvayt shimoli-g‘arbidagi al-Mutriba degan joyda qayd qilindi. Kuvaytlik meteorologlar taqdim etgan ma’lumotlar Butunjahon meteorologiya tashkiloti (AMO) tomonidan mutlaq rekord sifatida qayd etildi.
Ilgari 54 darajadan yuqori harorat ikki marta qayd qilingan — 1913-yilning 10-iyulida AQShning Kaliforniya shtatida joylashgan O‘lim vodiysida (56,7 daraja) hamda 1922-yilning 13-sentyabr kuni Liviya cho‘llarida joylashgan Italiya harbiy bazasida. Ammo har ikki holda ham o‘lchovlarni havaskorlar amalga oshirgan, uskunalarning aniqligi ham shubha ostida. Shu bois bu ikki ko‘rsatkich rekord sifatida qabul qilinmagan.