Yangi tekshiruvlar natijasida 2008 va 2012-yil Olimpiadalarida yana 45 sportchi dopingdan foydalangani aniqlandi

Xalqaro olimpiya qo‘mitasi 2008 va 2012-yilgi Olimpiya o‘yinlarida ishtirok etgan sportchilarning doping namunalarini tekshirishning ikkinchi bosqichi haqida ma’lum qildi. Uning yakunlariga ko‘ra yana 45 sportchidan olingan namunalar ijobiy natija berdi, deb xabar qiladi “RIA Novosti”.

Jumladan, Pekin Olimpiadasi ishtirokchilarining 30 ijobiy namunasidan 23 tasi medal yutib olgan atletlarga tegishli. Dopingda qo‘lga tushgan sportchilar sakkiz milliy olimpiya qo‘mitasi vakillari bo‘lib, to‘rt sport turidagi musobaqalarda qatnashgan.

London o‘yinlaridagi namunalardan esa 15 tasi ijobiy natija berdi. Namunalar sohiblari to‘qqiz mamlakat vakillari bo‘lib, ikki sport turi bo‘yicha musobaqalarda qatnashgan.

Testlardan o‘ta olmagan atletlarning umumiy soni 98 kishini tashkil etdi.

2008 va 2012-yilgi doping namunalarini qaytadan tekshirish shu yilning may oyida boshlangan edi. Qayta tekshirish ishlari 5-avgust kuni start oladigan Rio-de-Janeyro Olimpiadasi paytida davom ettiriladi.