Tesla yaqin yillarda avtomobil bozorining aksariyat qismini qamrab olish, 2017-yilda esa o‘zining ilk yuk mashinasi va avtobusini taqdim etishni rejalashtirmoqda. Bu haqda kompaniya asoschisi Ilon Mask tomonidan tuzilgan “Bosh reja. Ikkinchi qism” (Tesla birinchi qismni 10 yil avval e’lon qilgandi) rejasida ma’lum qilingan, deya xabar beradi “RBK”.
Maskga ko‘ra, ommaviy foydalanish uchun elektrokarlardan tashqari yana ikkita elektr transport vositasi — yuk avtomobili va ko‘p o‘rinli shahar transporti modelini yaratish zarur. Hozirda ushbu avtomobillarning loyihalari ishlab chiqilish jarayonida bo‘lib, kelgusi yili taqdim etilishi kutilmoqda.
Yaratilayotgan yuk avtomobili modeli Tesla Semi deb nomlangan. U yuk transporti qiymatini sezilarli ravishda pasaytirishi, shu bilan birga, uning xavfsizligini oshirishi va boshqaruvni qiziqarli bo‘lishini ta’minlashi lozim.
Avtopilot mavjudligi avtobus o‘lchami kichrayishi va boshqaruvda haydovchiga ehtiyoj sezmaslik imkoniyatini tug‘diradi. Jamoat transporti modeli yo‘nalishi bo‘ylab yo‘lovchilarni yo‘lma-yo‘l olib ketishi, avtobusni telefon yoki bekatdagi maxsus tugma yordamida chaqirish mumkin. Unda nogironlar kursisi, aravacha va velosipedlarni tashish imkoniyati tug‘iladi.
Izoh (0)