Xonanda Shahzoda tomonidan kuylangan “O‘zbegim” nomli qo‘shiqning matniga turli e’tirozlar bildirilgani munosabati bilan, jurnalist Feruz Muhammad she’r muallifi, O‘zbekiston xalq shoiri Iqbol Mirzo bilan bog‘landi.
Ma’lumot uchun, qo‘shiq matnining asosan “yigirma besh yoshdasan, O‘zbegim” degan misrasi e’tirozlarga sabab bo‘lgan. Tanqidchilar O‘zbekiston tarixi 25 yil emas, bir necha ming yillardan iborat ekani bilan o‘z fikrini asoslashga harakat qilgan.
“She’rning ‘yigirma besh yoshdasan, O‘zbegim’ degan misrasida ma’no jihatdan hech qanday xatolik yo‘q. Adabiyotda mubolag‘a, bo‘rttirish, kuchaytirish kabi san’atlar bor. Bu o‘rinda so‘zlar ‘yigirma besh yoshdasan, mustaqilligingga 25 yil to‘ldi, yigirma besh yoshda sohibqiron bo‘lding, navqiron bo‘lding’, degan ma’noda qo‘llanilgan”, — dedi Iqbol Mirzo.
“Erkin Vohidov ham ‘Tarixingdir ming asrlar, ichra pinhon o‘zbegim’, deydilar. Ming asrni yillarda hisoblaydigan bo‘lsak, 100 ming yilga teng. 100 ming yillik tarix esa hech qaysi xalqda yo‘q, o‘zbek xalqining qadimiy tarixi 4—5 ming yillarga borib taqaladi. Men nahotki o‘zbek xalqining tarixini bilmasdan, 25 yillik tariximiz bor desam?!”, — dedi O‘zbekiston xalq shoiri.
“Yaxshilik qidirib qaragan, yaxshi ko‘z bilan nazar solgan kishi buni darrov anglab olgan bo‘lardi. Bir she’rimda yozganimdek, ‘kimdir daraxtga qarab tanburni o‘ylaydi, kimdir tandirni o‘ylaydi’. Bular she’rga, qo‘shiqqa tandir ko‘zi bilan qaragan. Qolaversa bu san’atkor qizimiz mashhur bo‘lgani uchun, qo‘shiq ham yaxshi chiqqani uchun kimlarningdir jig‘iga tegayotgan bo‘lishi mumkin. Menimcha klipi ham chiroyli ishlangan, qo‘shiqni ham aytilishi menga juda ham ma’qul”, — dedi Iqbol Mirzo.
“Meni tanqid qilgan Shuhrat Qayumovga ham, Gulchehra Umarovaga ham hech qanday e’tirozim yo‘q. O‘zbekiston xalq shoiri, Milliy musiqani rivojlantirish va muvofiqlashtirish kengashi raisi sifatida bir narsaga xursandman — meni, ya’ni, estrada va san’at sohasidagi rahbarlardan birini ham tanqid qilish mumkin. Men bundan xafa emasman”, — dedi O‘zbekiston xalq shoiri.
“‘She’riyat ko‘chasidan o‘tganmi?’, degan tanqidiy gaplarga javobim: rostdan ham hali she’riyat ko‘chasidan o‘tib bo‘lganim yo‘q. Bu ko‘cha, yo‘l go‘yo san’at va jurnalistikaga o‘xshagan cheksiz labirintdir. Asosiysi, o‘z yo‘lingni topib olish. Adabiyot ko‘chasida qolishga, undan o‘tib ketmaslikka tanqidchilarimga va’da beraman”, — deya qo‘shimcha qildi Iqbol Mirzo.
Shoir Iqbol Mirzo mazkur she’rning haqiqiy variantini taqdim etdi. She’rni e’tibor berib o‘qilsa, unda “O‘zbegim” so‘zi umuman yo‘qligiga guvoh bo‘lish mumkin. Mazkur so‘z xonanda yoki bastakor tomonidan she’rga qo‘shimcha qilingan, O‘zbekiston xalq shoiri esa bu qo‘shimchaga hech qanday e’tirozi yo‘qligini ma’lum qildi.
Qo‘shiq
Ha-a-a-y yurtim!Ko‘z ochib seni ko‘rdim.Bulbulzabon til berding,Sevgi to‘la dil berding.Oltin beshigim bo‘lding,Mangu qo‘shig‘im bo‘lding.Ha-a-a-y yurtim!O‘zim aylanay, yurtim.Yigirma besh yoshdasan,Gultojimsan boshdasan.O‘lkalar ko‘p, yurtlar ko‘p,Sen boshqasan, boshqasan.Tuprog‘i to‘tiyo yurt,Bag‘ri to‘la ziyo yurt.Osmonda oy yagona,Yerda o‘zing tanho yurt.Kimlarga armon bo‘lding,Kimlarga darmon bo‘lding.Buyuk ipak yo‘lidaEng ulug‘ karvon bo‘lding.O‘zingga qalqon bo‘lding,Muhtasham qo‘rg‘on bo‘lding.Yigirma besh yoshingdaSen Sohibqiron bo‘lding.Ha-a-a-y yurtim!Jonimni beray, yurtim.Quchog‘ing kezib yurdim,Iqbolim sezib yurdim.Suygansan onam bo‘lib,Baxtingda baxtim ko‘rdim.Ha-a-a-y yurtim!O‘zim o‘rgilay, yurtim.Iqbol Mirzo, O‘zbekiston xalq shoiri
Xonanda Shahzoda kuylagan qo‘shiq bilan quyida tanishish mumkin:
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)