Avstriyada yig‘in o‘tkazgan O‘zbekiston milliy terma jamoasi uning so‘nggi kunida Rossiya Premyer-Ligasi vakili “Ufa” klubiga qarshi o‘yinda maydonga tushdi va 2:2 hisobida durang o‘ynadi.
Uchrashuvning 2-daqiqasiga kelib hisob rossiyaliklarning braziliyalik hujumchisi Marsinyo tomonidan ochildi.
19-daqiqaga kelib Eldor Shomurodov muvozanatni tiklagan bo‘lsa, oradan ikki daqiqa o‘tib Jamshid Iskandarovning aniq zarbasidan keyin Samvel Babayan jamoasi hisobda oldinga o‘tib oldi.
Ustunlikni saqlab qolish O‘zbekiston milliy terma jamoasiga nasib qilmadi. 59-daqiqaga kelib Marsinyo penaltini aniq amalga oshirdi va yakuniy natijani o‘rnatdi — 2:2.
“Ufa” Rossiya Premyer-Ligasining 2015/16-yilgi mavsumini 12-o‘rinda yakunlagan.
O‘zbekiston milliy terma jamoasi Avstriyadagi yig‘in davomida “Borussiya Dortmund” o‘rinbosarlarini ham taslim qila olmagandi.
“Championat.asia” ma’lumotiga ko‘ra, bugun — 21-iyul kuni Samvel Babayan uning jamoasi Toshkentga qaytib keladi va 24-iyul kuni Iroq milliy terma jamoasiga qarshi o‘rtoqlik o‘yinida maydonga tushadi.
Izoh (0)