Rasmiy Kreml Sport arbitraj sudining (CAS) rossiyalik yengil atletlarning Rio-de-Janeyrodagi Olimpiya o‘yinlarida ishtirok etishiga ruxsat bermaslik haqidagi qaroridan afsusdaligini bildirdi. Bu haqda “Interfaks” xabar bermoqda.
“Albatta, Sport arbitraj sudining bunday qaroridan afsusdaligimni bildirishim mumkin, negaki bu barcha sportchilarimiz, barcha yengil atletlarimizga daxldor, shu bois, bizningcha, jamoaviy javobgarlikning joriy qilinishi bu vaziyatda to‘g‘ri bo‘lmasa kerak”, — dedi Kreml rasmiy vakili Dmitriy Peskov jurnalistlar bilan muloqot chog‘ida.
“Yangiliklar unchalik yaxshi emas, biz hali vaziyatni tahlildan o‘tkazib chiqishimiz lozim. Shu bois hozircha boshqa izoh bera olmayman”, — qo‘shimcha qildi u.
Bugun, 21-iyul kuni CAS Rossiya Olimpiya qo‘mitasining va 68 nafar rossiyalik yengil atletning apellyatsiyasini rad etdi. Ular Xalqaro yengil atletika federatsiyalari uyushmasining (IAAF) rossiyalik sportchilarning Olimpiya o‘yinlarida ishtirok etishiga qo‘ygan taqiqini qayta ko‘rib chiqishni so‘ragan edi. Shu tariqa, rossiyalik yengil atletlar Rio-de-Janeyrodagi Olimpiya o‘yinlarida ishtirok etmaydigan bo‘ldi. Faqatgina Darya Klishina va Yuliya Stepanova bundan mustasno — IAAF ilgariroq ularning ishtirokiga ruxsat bergan edi.
Izoh (0)