AQSh hukumati 1MDB ishi bo‘yicha “Uoll-stritlik bo‘ri” filmidan tushgan daromadni musodara qilmoqchi

AQSh adliya vazirligi Malayziyaning muammoli 1Malaysia Development Berhad (1MDB) taraqqiyot fondi ishi yuzasidan qiymati 1 milliard dollardan ortiq mulkni musodara qilishga urinmoqda, ular orasida san’at buyumlari, ko‘chmas mulk va Martin Skorsezening “Uoll-stritlik bo‘ri” filmidan tushgan daromad ham bor. Bu haqda “Interfaks” xabar bermoqda.

Adliya vazirligi Kaliforniya sudiga topshirgan hujjatlarda aytilishicha, aktivlar Malayziya bosh vaziri Najib Razzoqning o‘gay o‘g‘li va 1MDB bilan bog‘liq odamlar tomonidan noqonuniy tarzda taraqqiyot fondi mablag‘lariga sotib olingan.

Jinoyatchilar fondning jami 3,5 milliard dollardan ortiq pullarini o‘zlashtirib olgan, ularning 1 milliard dollarga yaqini AQSh bank tizimi orqali “yuvilgan”.

O‘tgan yil iyulida fond bilan bog‘liq tashkilotlardan Najib Razzoq hisob raqamiga 700 million dollarga yaqin mablag‘ o‘tkazilgani bildirilgan, o‘shanda sobiq bosh vazir Maxatxir Muhammad izdoshini poraxo‘rlikda ayblagandi. Malayziya bosh prokurori Muhammad Apandi Ali esa mazkur yirik summani (681 million dollar) “Saudiya Arabistoni qirollik oilasining xayriyasi” deb topgandi.