Osiyoda ikkinchi bo‘lgan O‘zbekiston futzal termasi Yevropaning uchinchi jamoasiga qarshi o‘ynaydi
10-sentabr kuni Kolumbiyada start oladigan futzal bo‘yicha Jahon Chempionatiga tayyorgarlik ko‘rayotgan O‘zbekiston futzal terma jamoasi Qozog‘istonga qarshi 2 ta o‘rtoqlik o‘yinida maydonga tushadi.
O‘zbekiston Futzal Assotsiatsiyasi ma’lumotiga ko‘ra, 9—10-avgust kunlari bo‘lib o‘tadigan bellashuvlarga Olmaota shahri mezbonlik qiladi.
O‘zbekiston Jahon Chempionatining “A” guruhida mezbon Kolumbiyadan tashqari Portugaliya va Panamaga qarshi kurash olib boradi. 2016-yilgi Yevropa Chempionatida Ispaniya va Rossiyadan keyin uchinchi bo‘lgan Qozog‘iston esa “E” guruhida Argentina, Salomon orollari, Kosta-Rika kabi termalar bilan to‘qnash keladi.
O‘zbekiston futzal terma jamoasi 2016-yilgi Osiyo Chempionatini vitse-chempion sifatida yakunlagan bo‘lsa, Qozog‘iston termasi shu yil o‘tkazilgan Yevropa Chempionatida Xorvatiya, Italiya, Serbiya kabi mamlakatlarni mag‘lub etishga muvaffaq bo‘lgan.
12—13—14-iyul kunlari Tojikiston termasiga qarshi 3 ta o‘rtoqlik o‘yinida maydonga tushgan O‘zbekiston termasi 1 ta o‘yinda 2:1 hisobida ustun kelgan, qolgan ikkitasida 3:3 va 5:5 hisoblarida durang o‘ynagandi.
