O‘zbekiston bosh vaziri Shavkat Mirziyoyev 19-iyul kuni Tojikiston bosh vaziri Qohir Rasulzodaga Tojikistonning Rog‘un GESini qurish rejasiga nisbatan xavotir bildirilgan maktub yubordi. Murojaat Tojikiston hukumatining Rog‘un GESi qurilishi bo‘yicha Italiyaning Salini Impregilo kompaniyasi bilan kelishuvga erishgani to‘g‘risidagi yangiliklar bilan bog‘liq, deb xabar beradi “Gazeta.uz”.
Maktub matni O‘zbekiston TIV matbuot xizmati tomonidan e’lon qilindi.
“Qurilish maydonida o‘tkazilgan bir qator tadqiqotlar, eng avvalo Jahon banki shafeligida olib borilgan loyihaning xalqaro kompleks ekspertizasida Rog‘un GESi butun Markaziy Osiyo mintaqasi uchun ulkan tahdidlarni keltirib chiqarishi tasdiqlangani, qo‘shni mamlakatlar rahbariyati va ekspertlari bayonotlarida bu bir necha marotaba qayd etilgani va Tojikiston hukumatiga xabar qilinganiga e’tiboringizni takroran qaratish lozim, deb hisoblaymiz. Aynan shu sababdan mazkur loyiha ortidagi ulkan texnogen, ekologik, ijtimoiy va iqtisodiy xatarlarni anglagan holda Jahon banki Rog‘un GESi qurilishini moliyalashda ishtirok etishdan voz kechgan edi”, — deyiladi maktubda.
“Bunyod etilayotgan Rog‘un GESi loyihasi 35 yildan ziyodroq avval, 70-yillardagi sovet gigantomaniyasi davrida ishlab chiqilgan bo‘lib, bugungi zamonaviy talablar va tajribalar uni tubdan qayta ko‘rib chiqishni talab qilmoqda. Balandligi bo‘yicha dunyoda tengi yo‘q hisoblangan 335 metrlik to‘g‘onga ega bu qadar ulkan GES majmuasi qurilishi uchun tanlangan maydonning seysmikligi Rixter shkalasi bo‘yicha 9−10 ball bo‘lgan tog‘ hududida ekani jiddiy shubha-gumonlarni keltirib chiqaradi. Obyektning ma’lum qilingan 3,9 milliard AQSh dollari miqdoridan ancha uzoq bo‘lgan umumiy smeta qiymatida amaliy aniqlik mavjud emas, loyihaviy hujjatlash ishlari to‘liq yakunlanmagan, obro‘li ekspertlar tomonidan bildirilgan jiddiy mulohazalar inobatga olinmagan”, — so‘zida davom etadi O‘zbekiston bosh vaziri.
“Tojikiston hukumatining qanday qilib bo‘lsa ham Rog‘un GESi qurilishini davom ettirishga bo‘lgan intilishi, ehtimoliy xavflar va Tojikiston tomoni tashlayotgan xatarli odimlarning to‘g‘rilab bo‘lmas oqibatlaridan xavotirlanmaslikning iloji yo‘q. Tojikiston hukumati mamlakat energiya ta’minotidagi mushkul muammolarni Tojikiston hududidagi ko‘p sonli daryo va suv manbalaridan foydalangan holda kichik va o‘rta GESlar qurish yo‘li bilan hal etishi mumkin deb hisoblashga barcha asoslarimiz bor. Bizga ma’lumki, bunday istiqbolli dastur Tojikistonda allaqachon amalga oshirilmoqda”, — qayd etiladi maktubda.
Izoh (0)