Xalqaro valyuta jamg‘armasi 2017-yilda Venesuelada 1600 foizlik inflyatsiya bo‘lishini aytdi

Joriy yil yakunlariga ko‘ra Venesuelada iste’mol narxlarining o‘sishi 480 foizni tashkil etishi mumkin, keyingi yilda esa 1600 foizga yetadi. Ushbu prognozni Xalqaro valyuta jamg‘armasi berdi, deb yozmoqda “Interfaks”.

Venesuela og‘ir iqtisodiy inqirozni boshdan kechirmoqda. Mamlakat oziq-ovqat, dori-darmon va boshqa tovarlar importiga qattiq bog‘lanib qoldi. Neft narxining tushib ketishi oqibatida oziq-ovqat va birinchi ehtiyoj mollari yetishmovchiligi avj oldi. Ko‘plab mayda savdo nuqtalari yopilib ketdi, do‘konlarda ulkan navbatlar yuzaga kelmoqda, talonchilik holatlari ko‘paymoqda.

Bir muddat ilgari Venesuela armiyasi aholini oziq-ovqat va dori-darmon bilan ta’minlash maqsadida portlarni va oziq-ovqat korxonalarini nazorat ostiga oldi.

Muxolifat bu vaziyatda prezident Nikolas Maduro va undan oldingi rahbar Ugo Chavesni ayblamoqda. Maduro, o‘z navbatida, yirik biznesmenlarni siyosiy maqsadlarda iqtisodiyotni boykot qilishda ayblamoqda.

Ko‘pgina ekspertlar mamlakat yaqinda Xalqaro valyuta jamg‘armasidan yordam so‘rashini kutmoqda. Ammo jamg‘arma vakillari Venesuela o‘n yil muqaddam, Chaves davrida uzilgan aloqalarni tiklashga shoshilmayotganini e’tirof etmoqda.