Kanadada aviashou vaqtida o‘quv samolyotining qulashi oqibatida havaskor uchuvchi halok bo‘ldi

Kanadada T-28 Trojan o‘quv samolyoti aviashou vaqtida quladi, uchuvchi halok bo‘ldi. Bu haqda CBC News xabar bermoqda.

Ko‘ngilsiz hodisa Alberta provinsiyasidagi Kold-Leyk shahrida sodir bo‘ldi. Voqea guvohiga aylangan shahar meri Kreyg Kouplendning aytishicha, uchuvchi, ehtimolga ko‘ra, havo kemasining boshqaruvini yo‘qotgan va yerga urilgan. Natijada kichik portlash yuz bergan.

Halokat muxlislardan uzoqda sodir bo‘lgani uchun hech kim jabrlanmadi. Baxtsiz hodisadan so‘ng aviashou bekor qilindi.

Halokatga uchragan samolyotni havaskor uchuvchi, biznesmen Bryus Evans boshqargan. U 2007-yilda T-28 Trojan samolyotini xarid qilgandi. Evansning parvoz tajribasi 4 ming soatdan ziyodni tashkil qilar edi.