Guruh o‘yinlarini g‘alabasiz yakunlagan “Olmaliq” Osiyo Chempionatining chorak finaliga yo‘l oldi
Klublar o‘rtasidagi Osiyo Chempionatida O‘zbekiston sharafini himoya qilayotgan “Olmaliq” futzal klubi chorak finalga birorta g‘alabasiz yo‘llanma olgan uchta klubdan biriga aylandi.
3 ta jamoa ishtirok etayotgan “B” guruhidagi 1-turda Eron chempioni “Tasisat Daryoiy”dan 3:4 hisobida yengilgan “Olmaliq”, 2-turda Livan chempioni “Al-Maydin” klubi bilan 2:2 hisobida durang o‘ynagandi.
Eron va Livan chempionlari o‘rtasidagi bellashuv natijasi “Olmaliq”ni chorak finalga olib chiqdi. Uchrashuvda forslar 6:2 hisobida zafar quchganidan keyin “Olmaliq” to‘plar nisbatiga ko‘ra guruhni o‘yinlarini 2-o‘rinda yakunladi.
“A” guruhida ishtirok etayotgan Yaponiya chempioni va “C” guruhidagi BAA chempioni ham chorak finalga g‘alabalarsiz yo‘llanma oldi.
Osiyo Chempionatining chorak final bellashuvlari 19-iyul kuni bo‘lib o‘tadi. Unda “Olmaliq” musobaqa mezboni — Taildandning “Chonburi” klubiga qarshi kurash olib boradi. Tay klubi turnirning “A” guruhini Yaponiya va Avstraliya chempionlarini mag‘lub etish bilan yakunlagandi.
