Anqara meri Ibrohim Melix Gyokchek Turkiyadagi to‘ntarishda Rossiyaning Su-24 bombardimonchi samolyotini urib tushirganlardan biri qatnashganligi, u ayni paytda AQShda istiqomat qiluvchi Fathulloh Gulen tashkiloti a’zosi ekanligini ma’lum qildi. Rasmiy Anqara Gulen tarafdorlarining Turkiyadagi faoliyatini “parallel davlat” deb ataydi va isyonda ayblamoqda. Bu haqda “Kommersant” xabar bermoqda.
Merning bildirishicha, “parallel davlat” Turkiyani xalqaro sahnada yakkalab qo‘yishga harakat qilgan.
“Kecha rossiyalik mehmon — prezident Putinning maslahatchisi bilan ko‘rishdik. U ham shu fikrda. Samolyot bilan bog‘liq hodisada mazkur tizim uchuvchilaridan biri qatnashgan, bu yuz foiz aniq. Shuningdek, isyonda ham ishtirok etgan. Hozirgacha buni oshkor qilmayotgan edik, lekin endi buning fursati yetdi — Rossiya bilan munosabatlarimizni shu nobakorlar buzdi”, — deya ta’kidladi Gyokchek.
Oldinroq Erdo‘g‘on tomonidan harbiy to‘ntarish tashkilotchisi deb atalgan Fathulloh Gulen ayblovlarni inkor qilgani xabar berilgandi.
Eslatib o‘tamiz, 16-iyulga o‘tar kechasi Turkiyada harbiy to‘ntarishni amalga oshirishga urinishda 200 ga yaqin kishi halok bo‘ldi, 2800 dan ortiq harbiy hibsga olindi.
Izoh (0)