Prezident Salva Kiir va uning o‘rinbosari Riyek Mashar tarafdorlari o‘rtasida to‘qnashuvlar davom etayotgan Janubiy Sudan poytaxti Jubadagi BMT lageri hududida tinch aholi vakillaridan 8 nafari halok bo‘ldi, 50 dan ortiq kishi jarohatlandi. Bu haqda xalqaro tashkilot bosh kotibining rasmiy vakili Stefan Dyujarrik ma’lum qildi, deya xabar beradi “TASS”.
“Janubiy Sudandagi BMT missiyasi qochoqlar uchun mo‘ljallangan qo‘riqlanadigan lagerda oxirgi 24 soat mobaynida 67 kishi jarohatlanganini ma’lum qildi. Ulardan 8 nafari keyinchalik olamdan o‘tdi”, — deya ta’kidladi Dyujarrik.
Oldinroq rasmiy vakilning o‘rinbosari Farxan Haq keyingi kunlarda to‘qnashuvlar tufayli BMT tinchlikparvar kuchlarining xitoylik ikki askari halok bo‘lgani, yana yetti kishi yaralanganini, ulardan ikki nafarining jarohati o‘ta jiddiy ekanligini bildirgandi. BMT Janubiy Sudandagi to‘qnashuvlar davom etsa, tegishli choralar ko‘rilishi haqida ogohlantirgan.
Ma’lumot uchun, Janubiy Sudandagi inqiroz 2013-yil dekabrida prezidentning isyonchilar sobiq yetakchisi Riyek Masharni o‘rinbosari lavozimidan bo‘shatish to‘g‘risidagi qaroridan so‘ng avj oldi. Ikki siyosatchining qarama-qarshiligi turli elatlarga mansub bo‘lgan tarafdorlari o‘rtasidagi shiddatli to‘qnashuvlarga sabab bo‘ldi. Oqibatda 10 mingga yaqin kishi halok bo‘ldi, 2,2 million kishi qochqinga aylandi.
Izoh (0)