Turkiyada Istanbul aeroportidagi teraktga aloqadorlikda gumonlanib 7-iyul, payshanba kuni yana olti nafar chet ellik qo‘lga olindi. Bu haqda AFP agentligi 8-iyul, juma kuni ma’lum qildi, deya xabar bermoqda “TASS”.
Hibsga olish 7-iyul kuni Istanbulda politsiya reydi davomida amalga oshirilgan.
Agentlikning ma’lum qilishicha, barcha qo‘lga olinganlar IShID terrorchilik guruhining a’zolari ekanligi taxmin qilinmoqda. Ular qaysi davlatlarning fuqarolari ekanligiga aniqlik kiritilmagan.
Turkiya hukumati Istanbul aeroportidagi terakt yuzasidan surishtiruv doirasida 4-iyuldan 5-iyul, seshanbaga o‘tar kechasi 17 nafar shaxs, jumladan Rossiyaning 11 nafar fuqarosiga nisbatan ayblov e’lon qilgan. 3-iyul kuni shu kabi ayblov 13 nafar gumonlanuvchi, jumladan, uch nafar chet ellikka nisbatan ilgari surilgan edi.
Eslatib o‘tamiz, Turkiyaning Istanbul shahridagi Otaturk nomli xalqaro aeroportda 28-iyun kuni terakt sodir etilgan edi. Hodisa oqibatida 40 dan ortiq kishi halok bo‘ldi va 240 ga yaqin kishi jabrlandi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)