8-iyul, juma kuni kechki payt AQShning bir necha shaharlarida politsiya zo‘ravonligiga qarshi ommaviy noroziliklar bo‘lib o‘tdi. Bu haqda “TASS” xabar bermoqda.
Besh nafar politsiyachi otib o‘ldirilgan Dallasda (Texas shtati) yuzlab kishilar ko‘pincha qora tanlilar qurboni bo‘layotgan politsiyachilar tomonidan haddan ziyod kuch ishlatilishiga norozilik bildirgan. Atlantada (Jorjiya shtati) minglab kishilar avtomobil ko‘priklaridan biridagi harakatni to‘sib qo‘ydi. Politsiyaning o‘zini tutishiga qarshi chaqiriqlar bilan chiqqanlarni xavfsizlik kuchlarining bir necha qatori to‘xtatib turgan.
Yangi Orleanda (Luiziana shtati) bir necha o‘nlab namoyishchilar shahar politsiya boshqarmasi oldida yerga yotib, 20 daqiqa atrofida harakatsiz qoldi va shu tariqa politsiyachilar otib o‘ldirgan aybsiz fuqarolar jasadlarini ifodaladi. Los-Anjeles (Kaliforniya shtati) ko‘chalari bo‘ylab o‘tgan tinchlik marshida taniqli insonlar, jumladan, rep ijrochisi Snup Dogg ishtirok etdi.
Bunday aksiyalar Kolorado, Massachusets, Minnesota, Michigan, Nebraska, Filadelfiya va boshqa shtatlardagi shaharlarda ham bo‘lib o‘tdi. Ular bilan bog‘liq tartibsizliklar haqida xabar berilmagan.
Eslatib o‘tamiz, shu haftada politsiyachilar Minnesota shtatidagi Folkon-Xayts va Luiziana shtatining Baton-Ruj shaharlarida afroamerikalik erkaklarni otib tashladi. Ushbu voqealar qora tanlilar noroziligiga sabab bo‘ldi.
Qayd etish kerakki, AQSh huquq-tartibot idoralari xodimlari xizmat vazifasini o‘tash chog‘ida yarim yil mobaynida 491 kishini otib o‘ldirdi.
Izoh (0)