Toshkent metrosining “Chilonzor” yo‘nalishida ham vagonlari soni uchta bo‘lgan harakatlanuvchi tarkiblar qatnay boshladi. Avvalroq metropolitenning “O‘zbekiston” va “Yunusobod” yo‘nalishlarida uchta vagonli poyezdlar harakatlanayotgani haqida xabar berilgan edi.
“Chilonzor” yo‘nalishida, uchta vagonli tarkiblar bilan birga, vagonlari soni avvalgidek to‘rtta bo‘lgan poyezdlar ham qatnamoqda. Toshkent metropolitenidagi manbaning “Daryo”ga ma’lum qilishicha, yoz mavsumida yo‘lovchilar soni kamaygani va elektr-energiya sarfini tejam maqsadida, sinov tariqasida vagonlar soni qisqartirilgan.
Qayd etish joiz, bir muddat avval “O‘zbekiston” yo‘nalishi uchun ta’mirdan chiqarilib, tayyorlanayotgani aytilgan yangi harakatlanuvchi tarkib “Chilonzor” yo‘nalishida ham yo‘lovchilarga xizmat ko‘rsatmoqda.
Ma’lumot uchun, uch yo‘nalish (“Chilonzor”, “O‘zbekiston” va “Yunusobod”) va 29 bekatdan iborat Toshkent metropolitenidan har kuni 200 mingga yaqin yo‘lovchi foydalanadi. 2015-yil iyulida metropolitendagi barcha harakatlanuvchi tarkiblar yangilanishi haqida xabar berilgan edi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)