Futbol bo‘yicha O‘zbekiston Oliy Ligasida 2016-yilgi mavsumning birinchi davrasi o‘z yakuniga yetdi. “Championat.asia” sayti ortda qolgan 15 tur yakunlariga ko‘ra chempionat statistikasini taqdim etdi.
Birinchi davrani Toshkentning “Obod” klubi 8 ochko bilan so‘nggi o‘rinda yakunladi. Bu jamoa Oliy Ligaga ilk bor qadam qo‘ygan.O‘zbekiston Oliy Ligasining bir necha yillik ishtirokchilari bo‘lgan “Navbahor” (14 ochko), “Andijon” (9 ochko) va “Qo‘qon—1912” (9 ochko) klublari birinchi davra yakuniga ko‘ra xavfli zonadan joy olgan va faqatgina “Obod”dan yaxshiroq natija qayd etgan.
Vodiyning bu triosi mavsumning teng yarmida safar uchrashuvlarining birortasida g‘olib chiqa olmadi. Mehmon jamoa maydonida o‘tgan uchrashuvlarda so‘nggi pag‘onadagi “Obod” ham ochko ola bilgan, vodiy triosida esa bu ko‘rsatkich “0” ga teng.
“Qo‘qon—1912” birinchi davrada eng ko‘p — 33 ta gol o‘tkazib yuborgan. Jamoaning safar uchrashuvlariga eng kam — 16 591 nafar muxlis tashrif buyurgan. Qo‘qon shahri klubi eng uzoq mag‘lubiyatni seriyani ham qayd etgan bo‘lib, 9-apreldan to 26-iyunga qadar bo‘lib o‘tgan 10 ta bellashuvning hammasida raqiblariga imkoniyatni boy bergan.
“Andijon” klubi esa eng uzoq golsiz seriyasi bilan yodda qoldi. Jamoa 16-iyundan boshlab o‘tkazilgan ketma-ket 4 ta bellashuvni golsiz tark etdi va mana shunday statistika bilan birinchi davrani yakunladi.
“Qo‘qon—1912” va Andijon” klublari safarda eng ko‘p gol o‘tkazgan jamoalar deb topildi — 20 tadan. Bu klublar birinchi davradagi birorta o‘yinda durang natijaga erisha olmadi.
Namanganning “Navbahor” klubi muxlislar tashrifi borasida O‘zbekistonning “Buxoro” va “Qizilqum” klublaridan keyin uchinchi jamoa bo‘lib turibdi. Turnir jadvalidagi ko‘rsatkich esa 10 taga yomonroq — 13-o‘rin.
“Navbahor” safar bellashuvlarida eng kam gol urgan jamoa — 4 ta. Avtogollar borasida esa yetakchi. Klub legionerlari Igor Golban va Oleksandr Pishur birinchi davrada 1 tadan avtogol qayd etgan.