AQShning Afg‘onistondagi harbiy kontingenti oldin rejalashtirilganidek 5,5 ming harbiy xizmatchigacha qisqartirilmaydi. Bu haqda prezident Barak Obama ma’lum qildi, deya xabar beradi “RBK”.
“Shu yil oxirigacha kontingentni 5,5 ming kishigacha qisqartirish o‘rniga Qo‘shma Shtatlar kelgusi yil, boshqaruvim yakunlangunga qadar Afg‘onistonda 8,4 ming atrofida harbiyni qoldiradi”, — deyiladi prezidentning Oq uy saytida chop etilgan murojaatida.
Obama mazkur qarorni Afg‘onistondagi AQSh va NATO qo‘shinlari qo‘mondoni general Jon Nikolson, mudofaa vaziri Eshton Karter va mamlakat qurolli kuchlari shtab boshliqlari qo‘mitasi rahbari Jozef Danford tavsiyalari asosida qabul qilganini bildirgan. Shuningdek, ushbu masala Kongress, Afg‘oniston hukumati va AQShning dunyodagi sheriklari bilan muhokama qilingan.
Obama Afg‘onistondagi vaziyatni “beqaror” deb baholadi va AQSh harbiy xizmatchilari mamlakatda avvalgidek afg‘on qo‘shinlari hamda politsiyasini o‘rgatish, “Tolibon” harakati va boshqa terrorchi guruhlarga qarshi operatsiyalarni o‘tkazishda ko‘mak berish bilan mashg‘ul bo‘lishini ta’kidladi.