Ronaldu ko‘lga uloqtirgan mikrofonni g‘avvoslar qidirib topdi

Ispaniyalik jurnalistning futbol bo‘yicha Portugaliya termasi hujumchisi Krishtianu Ronaldu tomonidan jahl ustida ko‘lga uloqtirilgan mikrofonini g‘avvos yordamida topishdi, deb yozadi “TASS”.

Hodisa Portugaliya termasining Vengriyaga qarshi uchrashuvi oldidan ro‘y berdi. Correio da Manhã nashri muxbiri terma jamoa futbolchilari sayr qilib yurganida Ronalduning oldiga kelib, “Vengriyaga qarshi o‘yinga tayyormisiz?” deb savol berdi. Ronaldu esa uning qo‘lidan mikrofonni tortib olib, ko‘lga otib yubordi.

Ronaldu bir necha bor Correio da Manhã’ni uning shaxsiy va oilaviy hayotiga oid yolg‘on ma’lumotlar tarqatganlikda ayblagan. Shu sababli 31 yoshli futbolchi Correio da Manhã muxbirlari savollariga hech qachon javob bermaslikka qaror qilgan.