Mikroprotsessorlar ishlab chiqaruvchi Intel Corp., Germaniyaning Bayerische Motoren Werke AG (BMW) va Gollandiyaning Mobileye N.V. kompaniyasi 1-iyul, juma kuni o‘z-o‘zini boshqaruvchi avtomobillar ishlab chiqish haqida kelishuv imzoladi, deb yozadi “Interfaks”.
Kompaniyalar ma’lum qilishicha, ular mashinalar ishlab chiqarishni 2021-yilgacha boshlamoqchi. Avtomobillar berilgan yo‘nalish bo‘yicha haydovchi ishtirokisiz harakatlanadi. Ular serqatnov shosselarga ham, kichik yo‘llarga ham birdek moslashtiriladi.
Mobileye avtomobilga o‘rnatilgan datchik va kameralardan olingan ma’lumotlarni qayta ishlash uchun dasturiy ta’minot yaratish bilan shug‘ullanmoqda, ma’lumotlar keyinchalik halokatlar oldini olish va haydovchiga ko‘mak berish tizimini ishlab chiqish uchun qo‘llaniladi. Ushbu tizimlardan asosiysi “aqlli” kamera bo‘lib, u yo‘ldagi obyektlargacha bo‘lgan masofani aniqlaydi, belgilarni kuzatadi va to‘qnashuvlar oldini olish bo‘yicha tavsiyalar beradi.
Izoh (0)