Yevropa futbol uyushmalari ittifoqi (UEFA) Yevro–2016 turniri chorak final uchrashuvlari oldidan Istanbul aeroportida sodir etilgan terakt oqibatida halok bo‘lganlar xotirasiga 1 daqiqa sukut saqlamaslikka qaror qildi. Bu haqda, UEFAga tayanib, Associated Press jurnalisti Rob Xarris Twitter’dagi sahifasida ma’lum qildi.
“Yevro–2016 turniri 1/4 finali oldidan 1 daqiqa sukut saqlanmaydi. UEFAning ma’lum qilishicha, agar fojia futbolga yoki turnir mezboni (Fransiya)ga bevosita bog‘liq bo‘lsa 1 daqiqa sukut saqlanadi”, – deb yozdi Xarris.
Eslatib o‘tamiz, 28-iyun kuni uch xudkush Istanbul aeroporti xalqaro terminalini portlatib yubordi. Terakt natijasida, so‘nggi ma’lumotlarga ko‘ra, 43 kishi halok bo‘ldi, 239 kishi jarohat oldi. Turkiya hukumati terakt munosabati bilan mamlakatda umummilliy motam e’lon qildi.Ma’lumot uchun, Yevro–2016 turniri chorak final uchrashuvlari 30-iyun – 3-iyul kunlari bo‘lib o‘tadi.
Izoh (0)