Tinchlik bo‘yicha Nobel mukofoti laureati, Polsha sobiq prezidenti Lex Valensa faol siyosiy hayotga qaytadi. Bu haqda u 27-iyun, dushanba kuni Gdanskda muxolifatdagi Demokratiyani himoya qilish qo‘mitasi vakillari bilan uchrashuvi chog‘ida ma’lum qildi, deya xabar beradi “TASS”.
“73 ga kirdim. Boshqa masalalar bilan shug‘ullanish, siyosatni esa yoshlarga, yangi avlodga qoldirish kerak deb o‘ylagan va shunday qarorga kelgandim ham. Biroq biz erishgan natijalar ko‘kka sovurilayotgani, Polsha vayron bo‘layotganini ko‘rib, kelgusida qanday harakat qilish lozimligi to‘g‘risida gaplashib olish zarurligi to‘g‘risidagi xulosaga keldim. Uzoq davom etgan ta’tilimni yakunlashimga to‘g‘ri keladigan ko‘rinadi. Hech qanday oqimlarga qo‘shilmayman, biroq barchaga yordam beraman, butun mamlakatni kezaman, uchrashuvlarga boraman”, — deya ta’kidlagan Valensa.
Sobiq prezidentga ko‘ra, mamlakatni hozirgi rasmiylar faoliyatidan qutqarish kerak deb hisoblagani uchun hamfikrlarini birlashtiradi va “Polsha demokratiyasini to‘g‘ri yo‘lga qaytarish” rejasini tuzishga harakat qiladi.
Izoh (0)