Ko‘p yillar yo‘l patrul xizmati tizimida ishlab, pora olishga odatlanib qolgan Aziz Turdiyevning iqrornomasi “Darakchi” nashrida chop etildi, deb xabar bermoqda “1news.uz”.
“Shayton yo‘ldan urdimi, nafsim ustunlik qildimi, yo‘l qoidasini buzgan haydovchilardan pul tama qilish odatini chiqardim. Borgan sari haydovchilardan ko‘proq pul oladigan bo‘ldim. Atrofdagilarga past nazar bilan qaraydigan, uncha-muncha narsani pisand qilmaydigan bo‘la boshladim”, – deb sobiq yo‘l noziri A.Turdiyevning “Darakchi” gazetasidagi so‘zlarini keltiradi “1news.uz”.
“Uning pushaymon bo‘lib tavba qilishiga o‘g‘lining avtohalokatga uchrab, nogiron bo‘lib qolgani sabab bo‘lgan. Tafsilotlarga qaraganda, A.Turdiyev mast holda mashina boshqarib ketayotgan haydovchidan 200 ming so‘m pora olib uni qo‘yib yuborgan. Oradan bir necha soat o‘tib, aynan o‘sha haydovchi uning o‘g‘lini urib yuborgan. Qayd etilishicha, qoidabuzar haydovchiga qonun doirasida chora ko‘rilgan. A.Turdiyevning o‘zi esa ichki ishlar tizimidan ketgani xabar qilingan”, — deyiladi xabarda.
Izoh (0)