TransCanada kompaniyasi AQSh ma’muriyatiga Kanadadan Meksika bo‘g‘ozining Texas shtatidagi qirg‘og‘igacha Keystone XL neft quvuri qurishga ruxsat bermagani uchun 15 milliard dollardan iborat da’vo qo‘zg‘adi. Bu haqda “TASS” xabar bermoqda.
Kompaniya rasmiy vakili Mark Kuperga ko‘ra, da’vo Shimoliy Amerika erkin savdo hududi haqidagi kelishuvga binoan arbitraj sudiga kiritilgan.
“TransCanada AQSh ma’muriyatining noqonuniy va asoslanmagan rad etishi tufayli mazkur loyihada ko‘p milliardli investitsiyasidan foydalanish imkoniyatidan mahrum bo‘ldi. Kompaniya o‘z huquqini himoya etish niyatida va ololmagan foydasini 15 milliard dollarga baholaydi”, — deya ta’kidlagan Kuper.
O‘tgan yil noyabrida prezident Barak Obama ushbu loyiha “AQSh milliy xavfsizligi manfaatlariga to‘g‘ri kelmasligi”ni bildirib, undan voz kechilishi haqida e’lon qilgandi. Boshidan loyihaga qarshilik qilib kelgan ekologik tashkilotlar shtab-kvartirasi Kanadaning Kalgari shahrida joylashgan kompaniyani “ochiqdan-ochiq cho‘chitish taktikasi”ni qo‘llashda ayblamoqda.
Izoh (0)