Iroq bosh vaziri Al-Falluja aholisini shaharni IShIDdan ozod bo‘lganligini nishonlashga chaqirdi

Iroq bosh vaziri Haydar al-Obodiy Al-Falluja aholisini shaharning IShID terrorchilik guruhidan ozod etilganligini nishonlash uchun ko‘chalarga chiqishga chaqirdi. Bu haqda, Alsumaria telekanali ma’lumotiga tayanib, “TASS” xabar bermoqda.

Telekanalning ma’lum qilishicha, Iroq bosh vaziri shaxsan Al-Fallujaga yetib kelib, shahar markazida milliy bayroqni ko‘tardi va uning aholisini ushbu kunni uylari va boshpanalaridan ko‘cha va maydonlarga chiqib nishonlashga chaqirdi.

Al-Obodiy Iroq bayrog‘i yaqin vaqt ichida Iroqning kattaligi bo‘yicha ikkinchi o‘rinda turuvchi Mosul shahrida ham o‘rnatilishini ma’lum qildi. Shahar hamon IShID tomonidan nazorat qilinmoqda.

26-iyun kuni Bag‘dod Al-Fallujaning ekstremistlardan to‘liq ozod etilganligini rasman e’lon qildi. Hukumat kuchlarining Al-Fallujada terrorchilar bilan bir oyga yaqin davom etgan janglar davomida o‘n minglab mahalliy aholi shahardan qochib chiqdi. To‘qnashuvlarda bir necha ming jangari o‘ldirilganligi ma’lum qilindi.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.